Ciapemo 'na brancà de case, metemoghe insieme le stale per le bestie e le tèse per la legna e il fien, sontemoghe na fontana e quatro orti e se trovemo davanti na contra, come che ghe n'è tante da le parti nostre.
Se po' ghe metemo anca un s-ciapo de bòce che suga, tre veciòte che fa la calsa sentà davanti casa, tri o quatro can che còre e snasa dapertuto e qualche galina, gavemo davanti ai nostri òci la contrà come che la gera vinti o ventisinque ani fa...
Eh sì! Da vinti ani a sta parte, anca ne le contrà la vita xe cambià.
El progrèsso xe rivà anca lì, el ga portà tante comodità che prima no ghe géra e in cambio el se ga portà via un po' de tranquilità, de serenità e solidarietà.
Tute ròbe che ne la contrà vècia maniera le gera necessarie par vivare pì del pan, pì de la legna pel fògo e de l' erba per le bestie.

Giglio SESAMO, Quadri de contrà, "Il nostro campanile", n.144, XXVI (1982), marzo / aprile.